قاضي دوست محمد اول: نامور عالم، بزرگ قاضي دوست محمد (اول) ولد قاضي شاهه محمد (ٻيو) 1785ع /1199هه ڌاري موري ضلعي نوشهري فيروز ۾ پيدا ٿيو. هيءُ بزرگ پنهنجي وقت جو وڏو عالم ٿي گذريو آهي. ٽالپرن جي حڪومت ۾ ’قاضي القضات‘ جي عهدي تي فائز هو. وڏو متقي ۽ پرهيزگار بزرگ هو. حياتيءَ جو وڏو عرصو درس تدريس ۽ تبليغ ۾ گذاريائين. هن جي طريقت جو سلسلو نقشبندي هو. اسلامي ڪانفرنس جي سلسلي ۾ تهران به ويو، اتي جي عالمن سان سندس خيالن جي وڏي وٺ ٿي، جيڪي کانئس بيحد متاثر ٿيا. هن ڪيتريون فتوائون به جاري ڪيون، جن تي برک عالم مفتي مخدوم محمد عارف سيوستانيءَ جون مهرون به لڳل آهن. قاضي دوست محمد ٽالپرن جي دور ۾ حيدرآباد جو قاضي به رهيو. هن درويش بزرگ 1853ع/ 1268هه ۾ وفات ڪئي. کيس موري ۾ دفن ڪيو ويو.